+ أول حاجه الاشبين بتمسك الطفل بايدها الشمال ده رمزل:
1)الشمال رمز للسكه الغلط اللي بيتولد الطفل بيها مع الشيطان قبل دخول السيد المسيح حياته بالمعموديه
2)مرفوض " ابعدوا عني يا ملاعين لا اعرفكم" ربنا مش بيرفض الخاطي اذا تاب لكن بيرفض الخاطي اذا استمر في خطيته
3)ملعون يعني بلا حمايه بلا مناعه واي حاجه تأثر فيه وتتعبه لأن اللي مش محمي بربنا، الشيطان بيستفرد به
+ وبعدين تبص للغرب:
1)ده رمز لعدم الرجاء لأن البعيد عن المسيح معندهوش رجاء عشان كده لما بنصلي بنبص للشرق وبيكون عندنا رجاء ومستنيين مجئ المسيح لكن اللي يدي للمسيح ظهره (باصص ناحية الغرب) بيبقي بدون رجاء
2)الغرب ناحية غروب الشمس وده معناه ان اليوم خلص يعني علاقتنا مع الخطيه تخلي حياتنا بتنتهي وبتتدمر ومليانه مشاكل
3)الحياه تبقي في ظلام واللي يمشي في الضلمه يبتدي يخبط لأنه مش شايف حاجه ويبتدي يأخد قرارات غلط ويندم ويجرح نفسه ويعيش في ليل لأنه أعمي مش باصص للمسيح في حياته "هذه هي الدينونه ان النور جاء الي العالم واحب الناس الظلمه اكتر من النور لان اعمالهم كانت شريره" وفي الضلمه الواحد لا يشوف نفسه ولا يشوف اللي حواليه فيلاقي نفسه وحش ودايما مش راضي عن نفسه ويبتدي يقول أنا ماليش قيمه ويبتدي ييأس والشيطان يسرقه
+ ترفع ايدها اليمين لفوق:
اراده قويه اني مش عايز الشيطان حاول تقول دلوقتي من كل قلبك انا برفضك ياشيطان ومش عايزك
+تقول اجحدك ياشيطان، انتهرك اطردك مالكش سلطان عليا؛
مين بيقول لربنا انا حياتي فيها خطايا كتير ومش عايز الشيطان من كل قلبي؟
قوله اجحدك بكل اعمالك الشريره وكل شرورك القبيحه وكل افكارك النجسه وكل اعمالك وسحرك اجحدك اجحدك اجحدك ( ابونا في العظه في الجزء ده كان بيقول الكلام ده والكنيسه كلها قالت وراه بصوت واحد)
+بعد كده بتبص للشرق:
هنا بقي فيه رجاء، زي ما الشمس بتشرق من الشمس وبيبتدي يوم جديد والنور بيدخل برضو في الوقت ده المسيح يبدأ يدخل ويملأ القلب وبتبتدي حياه جديده
"الاشياء العتيقه قد مضت هوذا الكل قد صار جديدا" يعني لما ابص للمسيح الفرحه تدخل والنور يدخل وابتدي اشوف نفسي واشوف السكه الغلط وأبعد عنها ( مش هكون أعمي) والحرامي (ابليس) لما النور ييجي اكيد بيمشي والكسل يمشي
+تحول الاشبين الطفل من ايدها الشمال لليمين:
اللي عنده رجاء في المسيح بينتقل من الرفض للقبول " قال للذين عن يمينه تعالوا اليّ يامباركي أبي" يعني تبقي مبروك ومبارك وتبدأ البركه تدخل حياتك " بركة الرب تغني ولا يزيد معها تعب"
+ترفع ايدها الشمال وتتعهد:
الايد الشمال رمز للضعف لأننا لما كنا في مواجهه مع الشيطان كنا ضعفاء من غير المسيح لكن دلوقتي قبلنا النعمه " تكفيك نعمتي لأن قوتي في الضعف تكمل" تقول لربنا انا ضعيق ومحتاج قوتك وهنا تبقي قوي واكيد اقوي من الشيطان
تتعهد وتقول: أؤمن بالله الآب ضابط الكل وابنه ربنا يسوع المسيح والروح القدس المحيي (وهنا برضو الكنيسه كلها بصوت واحد قالت ورا ابونا)
كده طلعت من دايرة الشيطان ودخلت لدايرة المسيح
+بعد كده يغطس ابونا الطفل في جرن المعموديه وهنا بنشترك معه في موته وقيامته ونخرج خليقه جديده
+آخر حاجه مسحة الميرون وكده بقيت كلك مقدس للمسيح ومافيش حد يستخدمك غيره
الكلام ده كله مش خلص وقت المعموديه لكن كل يوم نصحي نقول كده " اجحدك ياشيطان بكل اعمالك الشريره وكل شرورك القبيحه وكل افكارك النجسه وكل اعمالك وسحرك ومالكش سلطان عليا اجحدك اجحدك اجحدك" وتقبل المسيح وتقوله ": أؤمن بالله الآب ضابط الكل وابنه ربنا يسوع المسيح والروح القدس المحيي"
